Fundación Clínica Pardiñas, en colaboración coa web Riazor.org, entregarán o premio ao mellor xogador do Deportivo da Coruña ao longo da tempada 16-17. O futbolista premiado será aquel que recibise máis votos no citado foro ao termo da liga.
A mecánica do trofeo é sinxela: o día seguinte á finalización de cada partido ligueiro, os usuarios de Riazor.org poderán repartir ata 6 puntos entre 3 xogadores do Depor, cun máximo de 3 puntos para o deportivista máis destacado da xornada. A votación pecharase 3 días despois da súa apertura.
Ao termo da presente tempada, o xogador que máis votos acumulase será o gañador do Premio Fundación Clínica Pardiñas. En caso de empate a puntos, premiarase ao futbolista que fose votado en máis xornadas diferentes.
Ademais de participar na votación, todo o que queira poderá doar un euro ao labor de Fundación Clínica Pardiñas e entrará no sorteo de material deportivo asinado polos xogadores do clube coruñés. Con este donativo axúdase a que Fundación Clínica Pardiñas pode ofrecer tratamentos odontolóxicos a familias galegas sen recursos.
Lembramos que Fundación Clínica Pardiñas patrocinou este premio por segundo ano consecutivo. Na tempada anterior, o dianteiro coruñés Lucas Pérez foi o xogador premiado ao ser o futbolista con máis votos acumulados ao termo da liga. A entrega do galardón realizouse na sede da nosa Fundación.
